移民英国人生路不熟，屋企需要紧急维修时都好闭翳！近日有一名移英港男上网搵师傅帮手维修电箱，结果咁就中伏喇，该名师傅上到去话好难搞，不但要换个电箱，更要换晒所有天花灯，仲抬高价格，被笃爆食水深后，又唔肯出示单据，港男崩溃大呻“收我2100镑已经贵，仲同我讲唔合理，你肯畀张买材料单我，我咪跟返市价嘅人工”，愈谂愈唔顺气，于是发文公审对方。
该名移英港男在fb群组“英国香港人生活交流区”发文讲述事件经过，指自己“上去Mybuilder放咗个简单job，要求ECIR报告”之后，有个持牌嘅电工好快、夜晚都覆佢，于是即刻第二朝见面。对方话一定要换个fuel box，同换晒所有天花灯。港男指间屋係旧new built得14年楼龄，以英国嘅标准，直头唔係咩数字，但佢信任师傅嘅专业意见，即刻畀200镑订金，并叮咛要小心不会整花天花板。结果，全屋超过20几个天花灯位都披晒口，且所有工序都只係由一个年轻同事负责做。
之后，港男向师傅表示想换埋厨房两个射灯仔，对方竟然话收340镑，初时港男以为係合理，点知上网一查，发现两个灯都唔使30镑，遂向师傅拎收据但被拒，想取消退货，对方又话已安装咗，前后相隔不到30分钟，仲安慰港男话唔使咁紧张，总之畀觉得合理价就OK。
港男直接叫师傅讲个合理人工价，但对方叫佢自己决定。结果，埋单计数时，师傅不满港男只係畀人工70镑，材料30镑（市场价），话唔合理！港男嬲爆反击：“成个工程连试又唔係你做？嗰个人又唔係有牌嘅，我都忍，收我2100镑（30个天花灯＋2个厨房灯仔＋fuel box＋cert）已经贵，仲同我讲唔合理，你肯畀张买材料单我，我咪跟返市价嘅人工，睇吓而家边个唔合理”。
帖文引起网民热议，有人话港男“遇人不淑”、“哇，咁好搵？我哋喺香港帮人换三千蚊到”、“如果好嘅师傅，正常係唔会畀你24个钟book到，因为多生意。畀你咁快book到啲期夹都唔使夹，即係好得閒无乜生意，要自己小心。”
发表于 2023-9-28 16:48:10