农曆新年有不少食肆餐厅都会收取“双计”或“三计”，不过有网民日前在社交平台分享，新年期间到茶餐厅食早餐，竟获收银员派利是，而且“Lunch encore，都仲有得派！”，感到十分惊喜。不少网民都大讚该店“好有人情味”、“好窝心”。
有网民在fb群组“香港茶餐厅及美食关注组”发文表示，自己新年期间，在油麻地街市附近的茶餐厅食早餐，“埋单时收银姐姐派利是就第1次见，仲要食个早餐得$31，咁都派返$10比我”。事主表示见个个埋单都有派，初时以为送挥春。
事主中午再去同一间茶记用膳，竟继续有利是收，“Lunch encore，都仲有得派！”事主笑言不会开名，以免被人话作故仔卖广告。留言区有其他食客留言晒出自己的利是，称“我今朝都收到”。
不少网民大讚“攞个意头~”、“派得多搵得多啊”、“又得派，钱不重要，最重要係心意，大家都开心，收银姐姐真係好的！”、“大家开心，好似比咗折咁”、“搵到又派俾大家，新年大家开心”、“几开心呀，我会帮衬佢一年。”
有网民认为“其实利是呢样传统习俗，真係要承传落去。重点係人人收得开心，加埋有童年回忆，呢样先最宝贵，唔係几钱问题。咁当然啦，富裕人家，就应派多啲，银两大啲，自己有福都要分啲比贫苦大众，咁先係真正厚福之人。”
发表于 2024-2-17 16:15:30