“同路人”呢支旗真係好值钱，香港人帮香港人吖嘛，不过係你被人当水鱼囉。话说近日有一名移英港人在网上大呻“被人昆”，皆因他初到贵境，在围炉群组识到一个人气旺盛嘅谷主，在对方的介绍下搵到个装修师傅，点知“原来个师傅每单嘢要付畀佢好几个%(巴仙)佣金”，咁羊毛出在羊身上，即係自己畀咗都唔知，直指如果当初谷主讲清楚係“有赏介绍”的话，都唔会唔嬲喎。
该名移英港人日前在社交平台发文讲述经过，表示“伦敦北有个香港人谷人气旺盛，谷主待人热情，BNO港人有何疑问，谷主都会及时解答”，不论衣食住行、装修法律都有好介绍，只要话係谷主介绍实有优惠。谷友并会定期搞聚会联络感情，令一班谷友无不感激万分，更尊佢为教主，齐呼“教主万岁！”
不过，事主忆述“前几日无意中听到我个装修师傅同佢通电话，原来个师傅每单嘢要付畀佢好几个%佣金”。有数得计，装修閒閒地都要好几万镑，事主怒斥：“你弹咗个电话畀我，就收我好几个%佣金？你周围咁多房地产仲要赚我哋嘅血汗钱？”
事主坦言，如果对方一早讲清楚係有赏介绍，都唔会咁嬲，慨叹“又话香港人帮香港人，原来我哋当佢係教主，佢只当我哋係水鱼！”不过，帖文惹来不少网民嘲讽，“同你有亲咩？做义工咩？”、“条友都傻，香港就係抽水港，香港人就係靠中间抽水，代理，做扯皮条，白手套搵食， 由清代做到今日。真係‘帮香港人’？ 搵食咋！”
发表于 2024-1-29 15:27:43